Ζεὺς, γάμους τελῶν, συγκαλεσάμενος τὰ ζῶα πάντα εἱστία. μόνης δὲ χελώνης ὑστερησάσης, διαπορῶν τὴν αἰτίαν τῇ ὑστεραίᾳ ἐπυνθάνετο αὐτῆς · “διὰ τί μόνη ἐπὶ τὸ δεῖπνον οὐκ ἦλθες”; τῆς δὲ εἰπούσης “φίλος οἶκος ἄριστος οἶκος,” ἀγανακτήσας κατ’αὐτῆς παρεσκεύασεν αὐτὴν τὸν οἶκον αὐτὸν βαστάζουσαν περιφέρειν “. οὕτω πολλοὶ τῶν ἀνθρώπων αἱροῦνται λιτῶς οἰκεῖν ἢ παρ’ἄλλοις πολυτελῶς διαιτᾶσθαι.