81.1ψαλμὸς τῷ Ἀσάφ. ὁ θεὸς ἔστη ἐν συναγωγῇ θεῶν, ἐν μέσῳ δὲ θεοὺς διακρινεῖ.

81.2ἕως πότε κρίνετε ἀδικίαν καὶ πρόσωπα ἁμαρτωλῶν λαμβάνετε; (διάψαλμα).

81.3κρίνατε ὀρφανῷ καὶ πτωχῷ, ταπεινὸν καὶ πένητα δικαιώσατε ·

81.4ἐξέλεσθε πένητα καὶ πτωχόν, ἐκ χειρὸς ἁμαρτωλοῦ ρύσασθε αὐτόν.

81.5οὐκ ἔγνωσαν οὐ δὲ συνῆκαν, ἐν σκότει διαπορεύονται · σαλευθήσονται πάντα τὰ θεμέλια τῆς γῆς.

81.6ἐγὼ εἶπα · θεοί ἐστε καὶ υἱοὶ Ὑψίστου πάντες ·

81.7ὑμεῖς δὲ ὡς ἄνθρωποι ἀποθνήσκετε καὶ ὡς εἷς τῶν ἀρχόντων πίπτετε.

81.8ἀνάστα, ὁ Θεός, κρίνων τὴν γῆν, ὅτι σὺ κατακληρονομήσεις ἐν πᾶσι τοῖς ἔθνεσι.