Epigrams

ἐκ πυρὸς ὁ ῥαιστήρ, καὶ ὁ καρκίνος, ἥτε πυράγρη

ἄγκεινθ’Ἡφαίστῳ, δῶρα Πολυκράτεος,

ᾧ πυκνὸν κροτέων ὑπὲρ ἄκμονος εὕρετο παισὶν

ὄλβον, ὀϊζυρὴν ὠσάμενος πενίην.

Κλειοῦς αἱ δύο παῖδες Ἀριστοδίκη καὶ Ἀμεινὼ

Κρῆσσαι, πότνια, σῆς, Ἄρτεμι, νειοκόρου

τετραετεῖς ἀπὸ μητρός. ἴδοις, ὤνασσα, τὰ τῆσδε

εὔτεκνα, κἀντὶ μιῆς θὲς δύο νειοκόρους.

ὤλεσεν Αἰγαίου διὰ κύματος ἄγριος ἀρθεὶς

λὶψ Ἐπιηρείδην Ὑάσι δυομέναις,

αὐτὸν ἑῇ σὺν νηὶ καὶ ἀνδράσιν ᾧ τόδε σῆμα

δακρύσας κενεὸν παιδὶ πατὴρ ἔκαμεν.