Epigrams

μαινὰς Ἐνυαλίου, πολεμαδόκε, θοῦρι κράνεια,

τίς νύ σε θῆκε θεᾷ δῶρον ἐγερσιμάχᾳ;

“μήνιος · ἦ γὰρ τοῦ παλάμας ἄπο ῥίμφα θοροῦσα

ἐν προμάχοις Ὀδρύσας δήιον ἀμπεδίον”.

μέλλον ἄρα στυγερὰν κἀγώ ποτε δῆριν Ἄρηος

ἐκπρολιπγοῦσα χορῶν παρθενίων ἀΐειν

Ἀρτέμιδος περὶ ναόν, Ἐπίξενος ἔνθα μ’ἔθηκεν,

λευκὸν ἐπεὶ κείνου γῆρας ἔτειρε μέλη.

Ἀμφαρέτας κρήδεμνα καὶ ὑδατόεσσα καλύπτρα,

Εἰλείθυια, τεᾶς κεῖται ὑπὲρ κεφαλᾶς,

ἇς σε μετ’ἐκαλέσσατο λευγαλέας οἱ

κῆρας ἀπ’ὠδίνων τῆλε βαλεῖν λοχίων.

οὐκέτι δὴ τανύφυλλον ὑπὸ κλάκα κλωνὸς ἑλιχθεὶς

τέρψομ’ἀπὸ ῥαδινῶν φθόγγον ἱεὶς πτερύγων ·

χεῖρα γὰρ εἰς † ἀρετὰν παιδὸς πέσον, ὅς με λαθραίως

μάρψεν, ἐπὶ χλωρῶν ἑζόμενον πετάλων.

ἵζευ ὑπ’αἰγείροισιν, ἐπεὶ κάμες, ἐνθάδ’, ὁδῖτα,

καὶ πῖθ’ἆσσον ἰὼν πίδακος ἁμετέρας ·

μνᾶσαι δὲ κράναν καὶ ἀπόπροθι, ᾇ ⏑ ἔπι Γίλλῳ

Σῖμος ἀποφθιμένῳ παιδὶ παριδρύεται.

Αἰόλον ἱμεροθαλὲς ἔαρ φαίνουσα, μέλισσα

ξουθά, ἐφ’ὡραίοις ἄνθεσι μαινομένα,

χῶρον ἐφ’ἡδύπνοον πωτωμένα, ἔργα τίθευ σύ,

ὄφρα τεὸς πλήθῃ κηροπαγὴς θάλαμος.

εἰνοσίφυλλον ὄρος Κυλλήνιον αἰπὺ λελογχώς,

τῇδ’ἕστηκ’ἐρατοῦ γυμνασίου μεδέων,

Ἑρμῆς · ᾧ ἔπι παῖδες ἀμάρακον ἠδ’ὑάκινθον

πολλάκι, καὶ θαλεροὺς θῆκαν ἴων στεφάνους.